दिसते मजला सुखचित्र नवे
मी संसार माझा रेखिते
प्रीत तुझी माझी फुलावी या फुलत्या वेलीपरी
भाव मुके ओठांत यावे गंध जसा सुमनांतरी
शब्दाविना मनभावना अवघ्याच मी तुज सांगते
दिसते मजला सुखचित्र नवे
मी संसार माझा रेखिते
हात तुझा हाती असावा साथ तुझी जन्मांतरी
मी तुझिया मागून यावे आस ही माझ्या उरी
तुजसंगती क्षण रंगती निमिषात मी युग पाहते
दिसते मजला सुखचित्र नवे
मी संसार माझा रेखिते
स्वर्ग मिळे धरणीस जेथे रंग नवे गगनांगणी
सप्तसूरां लेवून यावी रागिणी अनुरागिणी
तुझियासवे सुखवैभवे सौभाग्य हे नित् मागते
दिसते मजला सुखचित्र नवे
मी संसार माझा रेखिते
गीत – शांता शेळके
संगीत – अनिल-अरुण
स्वर – अनुराधा पौडवाल
चित्रपट – अष्टविनायक